लगाम न्यूज नेटवर्क
कुरुंदवाड वार्ताहर /नंदकुमार सुतार
मुलींमध्ये देशसेवेची भावना, शिस्त आणि आत्मविश्वास निर्माण करण्यासाठी राष्ट्रीय छात्र सेनेचे (NCC) प्रशिक्षण अत्यंत आवश्यक आहे. आजच्या काळात देशाच्या संरक्षण क्षेत्रात महिलांचे योगदान सातत्याने वाढत आहे. त्यामुळे मुलींना लहान वयापासूनच शिस्त, नेतृत्वगुण, स्वसंरक्षण, आपत्कालीन परिस्थितीतील मदतकार्य आणि देशभक्तीचे संस्कार मिळणे गरजेचे आहे.
१५ ऑगस्ट निमित्त येथील सीताबाई पटवर्धन हायस्कूलमधील राष्ट्रीय छात्र सेनेच्या विद्यार्थिनींनी शहरातील सार्वजनिक ध्वजाला सलामी दिली. येथील सीताबाई पटवर्धन हायस्कूलमध्ये राष्ट्रीय छात्र सेनेच्या माध्यमातून विद्यार्थिनींना कवायत, शारीरिक प्रशिक्षण, प्राथमिक उपचार, आपत्ती व्यवस्थापन, शिबिरे आणि नेतृत्व प्रशिक्षण दिले जाते. या प्रशिक्षणामुळे मुलींमध्ये आत्मविश्वास वाढतो तसेच संकटाच्या प्रसंगी धैर्याने परिस्थितीचा सामना करण्याची क्षमता निर्माण होते.
देशाच्या सुरक्षेसाठी केवळ सैनिकच नव्हे, तर जबाबदार, शिस्तबद्ध आणि राष्ट्रनिष्ठ नागरिकांचीही गरज असते. या दृष्टीने मुलींचा NCC मधील सहभाग महत्त्वपूर्ण ठरतो. भविष्यात सैन्य, पोलीस, अग्निशमन, आपत्ती व्यवस्थापन तसेच इतर सुरक्षा क्षेत्रात काम करण्यासाठीही हे प्रशिक्षण उपयुक्त ठरू शकते.
मुलींना सक्षम करणे म्हणजे देशाची सुरक्षा अधिक मजबूत करणे होय. त्यामुळे शाळा आणि महाविद्यालयांमध्ये मुलींच्या NCC सहभागाला प्रोत्साहन देऊन त्यांना अधिकाधिक प्रशिक्षणाच्या संधी उपलब्ध करून देणे, ही काळाची गरज आहे. प्रशालेमध्ये मुख्याध्यापिका विनया जाधव यांच्या मार्गदर्शनाखाली क्रीडा संचालक, बाबासाहेब भूजुगडे यांच्या अथक प्रयत्नामुळे राष्ट्रीय छात्र सेनेच्या विद्यार्थिनी प्रशिक्षण घेत आहेत. अनेक विद्यार्थी पोलीस, होमगार्ड व संरक्षण विभागामध्ये कार्यरत आहेत.
टिप्पणी पोस्ट करा